Pjevačica Ksenija Pajčin tragično je izgubila život 16. marta 2010. godine, kada je prvo nju, a potom i sebe, ubio tadašnji dečko Filip Kapisoda, u stanu na Voždovcu u Nikšićkoj ulici broj 5.

Ksenija Pajčin ostala je upamćena kao bistra djevojka, puna energije i života, a njene kolege ističu da nije bilo odanijeg prijatelja. Rođena je 3.12.1977. godine u Beogradu. Završila je osnovnu školu "Filip Kljajić Fića“ na Banovom brdu, a potom i petu ekonomsku u Rakovici. Još kao djevojčica pokazivala je talenat za ples. Bavila se pjevanjem i plesanjem.

Karijeru je započela plešući po diskotekama, a potom se našla i u estradnim vodama, kada je postala članica grupe “Dak” i snimila pjesmu “Dačo, volim te”, koja je postala hit devedesetih godina.

Sa samo 15 godina odlazi u Milano da bude model, ali ubrzo se vraća i oprobava se kao voditeljka, dok u međuvremenu otvara školu plesa u Beogradu.

Tokom karijere izdala je pet albuma i devet singlova.

Filipa Kapisodu, brata rukometaša Petra Kapisode srela je na moru u Crnoj Gori 2008. godine, a upoznali su se nekoliko mjeseci kasnije na njegovo insistiranje. Odmah su započeli vezu koja je bila puna ljubavi, ali i ljubomore i turbulentncija.

- Nikada me niko nije volio ovoliko kao Filip. Ne moramo ni da govorimo, dovoljno je samo da se pogledamo. Poznaje me bolje nego što ja sebe znam - pričala je Ksenija prijateljima.

Da je ljubomora obostrana pokazala je i Ksenija koja se oštro protivila Kapisodinom učešću u VIP "Velikom bratu". Međutim, on je ipak ušao u kuću na mjesec dana, i Ksenija je to veoma teško podnijela. Uslijedio je raskid.

Poslije raskida sa Filipom u martu 2009, dok je Filip, navodno, bio u vezi sa izvjesnom Evom Gonzales iz Milana, Ksenija je pričala da "još čeka svoju pravu ljubav sa kojom će se ostvariti kao majka".

– Ima li išta ljepše od toga postati roditelj?! Za tu priču je potrebno dvoje i pošto nemam namjeru da se udajem više puta i znam da bih teško podnijela razvod, svađe i te mučne situacije, onda se i ne zalijećem. Dijete je svetinja i njime želim da se bavim. Radujem se tom danu! – ispričala je Ksenija.

Da je ljubav bila velika svjedoči i to da se par pomirio već 2010. godine i to na njeno insistiranje. Otpočeli su zajednički život u njenom stanu. Međutim, posesivnost je i njega i nju učinila razdražljivim, tužnim, a povremeno i bijesnim.

– Ponašao se čudno. Niko nije znao razlog, niti šta se dešavalo. Nije htio mnogo da priča o njihovoj vezi. Uvijek je govorio da je gotovo, da se viđaju iz navike. Na posljednjoj žurki bio je u njenom društvu i nije smio da se javi prijateljima. On mi kaže "ćao", a ona ga ćušne... Njihova veza bila je bolesna... Neprimjereno je tražiti krivca kada ga nema. Ne možemo tu ništa da objasnimo – rekla je tada pjevačica Goga Sekulić, Filipova prijateljica.

Filip je takođe branio Kseniji da pogleda drugog muškarca. Odmah bi uslijedila prepirka i svađa. Za nju je morao da postoji samo on i niko više.

- Ne mogu više s njim. Volim ga, ali ne mogu da trpim njegovu ljubomoru i posesivnost. Toliko me voli da me guši svojom ljubavlju - žalila se pop pjevačica prijateljima.

- Ubiću se ako me Ksenija ostavi - ponavljao je Filip posljednjih dana.

Uslijedile su česte svađe i nekontrolisani napadi, da bi se kobne večeri u svađu umiješale i pesnice.

Prema navodima medija, Kapisoda je držao pištolj na Ksenijinom čelu prije nego što je ispalio smrtonosni hitac, a tragovi baruta na njenim rukama ukazivali su na to da je pjevačica pokušala da odgurne pištolj. Odmah nakon prvog pucnja, Filip je stavio cijev sebi u usta i povukao obarač.

Beživotna tijela u lokvama krvi, u stanu u Nikšićkoj ulici, pronašla je Ksenijina majka Ljubica.

(Blic.rs, DEPO PORTAL, BLIN MAGAZIN/dg)